ابدأ بنفسك أولا

من خلال متابعتي لأزمة أنفلونزا الطيور لفتت نظري ملحوظه مهمه
كنت كل ما أشوف حالة أصابه جديده ألعن أبو التخلف اللي مخلي الناس لسه بتربي فراخ في بيوتها
و كان الحل الأمثل في وجهة نظري إن الناس تتخلص من الفراخ اللي عندها دي وتبطل تربيه منزليه
طول الفتره دي من أول ما بدأت أنفلونزا الطيور ما لفتش نظري ولا خطر في بالي أن ماما مربية ملايين من البط والوز والفراخ فوق السطح
طول الأزمه و أنا بفكر إزاي نخلي الناس تبطل التربيه المنزليه مفكرتش لحظه أن انا أقنع أمي أنها تخلص من الطيور اللي فوق السطح
ولاحظت أن دي طريقة تفكير معظمنا إن ما كنش كلنا في كتير من المواضيع
كل واحد بيبص للموضوع نظره عامه
عايز الناس تعمل كل حاجه مع أنه نفسه معملهاش
و قولت لنفسي إن لو كل واحد فينا بدأ بنفسه أكيد كان حالنا أتغير كتير